KG railway line pe Warisliganj aur Nawada station ke beech double line chalane ke liye Monday ko pre-NI ka kaam start hona tha, lekin kuchh karanon ki wajah se ye start nahin ho paya. Double line ka kaam aage badhane ke liye Monday dopahar baad se char ghante ka power block...
more...

aur traffic block lena tha. Lekin bina kisi karan Gaya se khulne wali pehli train Gaya-Jhajha 03386 subah panch baje khul kar bhi panch ghante vilamb se 10:09 baje Nawada station pahunchi. Iske baad Gaya se khulne wali dusri train Gaya-Jamalpur 05404 subah chhe baje khul kar atakte-atakte 4:42 ghante late se Nawada pahunchi. Jabki Gaya se khulne wali teesri train 03356 MEMU train ka haal bhi khusta hi raha. Ye train subah 7:20 baje Gaya se khuli lekin sabhi jagah ise rok kar rakha gaya aur antat: yaatriyon ko bhaari kashth dete hue char ghante vilamb se 11:13 baje Nawada station pahunch saki. Is bhishan garmi mein bilkul avyavasthit tarike se jaari rail parichalan ki wajah se yaatriyon mein aakrosh hai. Gaya-Jhajha ke yaatriyon ke saath train ke guard ne kiya durvyavhaar. Gaya se khulne wali pehli train Gaya-Jhajha 03386 ke yaatriyon ke saath Karjara station per train ke guard aur duty se laut rahe kuchh assistant loco pilot ne badsaluki kar dali. Iske baad yaatri bhi bifer pad gaye aur nokjhonk ki sthiti utpann ho gayi. Is train ke saath aaj puri tarah se khelwaad kiya ja raha tha. Subah panch baje khuli train Karjara aate-aate hi teen ghante late ho chuki thi jabki Gaya junction se Karjara station tak ki duri mahez 16 km hai. Sabse pehle to Gaya station se ekdam samay per bahar nikal kar do km aage Bageshwar gumti per is train ko khada kar diya gaya. Yaha se chalne ke baad Manpur mein rok kar rakha gaya. Paimar mein bhi yahi hua aur Karjara station per ise ekdam se shant hi kar diya gaya. Isse pareshan kai dainik aur aam yaatriyon ne train ke guard ke pass ja kar der hone ki jaankari chahi to guard kahne lage ki train mein koi ticket lekar chalata hi nahin to train kitne samay per chalegi. Jab dainik yaatriyon ne apna MST dikhaaya aur puchha un jaise ticketdhaarokon ke liye kya vyavastha hai, unhe kyun pareshan kiya ja raha hai, yeh bataen to guard aur unki cabin mein maujud duty se laut rahe char assistant loco piloton ne gundon ki bhasha bolna shuru kar diya. Yaatriyon ke saath sabhi durvyavhaar karne lage. Halaanki kade virodh ke turant baad train rawana kar di gayi. Ullekhaniy hai ki isse kuchh dinon purv Karjara station per ja kar bhi jab yaatriyon ne latelatifi ki shikayat darj karai thi to local hone ki dhamki dete hue kuchh railakarmion ne yaatriyon ke saath beja harkat kar dala tha. Anek yaatriyon ne kaha ki aaye din ho rahi aisi harkaton se railakarmie baj nahin aaye to ye gussa kabhi bhi visphotak ho sakta hai. Pre-NI ka kaam ek din tala, ab aaj se sambhavith. Kaam agency IRCON dwara jaari schedule ke mutabik aagle ek saptaah tak teen se char ghanton ka block lena hai. Block ki shuruaat Monday se nahin kar ek din ke liye tal diya gaya hai. Kaam ki aavashyakta aur tamam vyavasthagit sahuliyaton ke lihaj se hi suvidhanusar block liye jaane ki baat kahi gayi hai. Mili jaankari ke mutabik, Nawada station per hone wale kaam ko lekar aagami 29 June tak char ghante ke liye power block aur traffic block lena hai. Jabki 30 June se 01 July tak teen ghante ka power block aur char ghante ka traffic block liya jaayega. Issi prakar, 26 se 27 June tak Warisliganj station per hone wale kaam ke liye char ghante ka power block aur traffic block liya jaayega. Jabki 28 June ko teen ghante ka traffic block aur 29 June ko do ghante ka traffic block tatha teen ghante ka main line ke liye power aur traffic block liya jaayega. Iske baad, 30 June ko char ghante ka traffic block samet do ghante ka wheel free block liya jaayega. 01 July tak teen ghante ka traffic block liya jaayega jabki char ghante ka wheel free block liya jaayega. CRS ke inspection mein iske baad sab kuchh sahi raha to aagami 02 July double line per rail parichalan shuru ho jaayega.